erfgoedcentrum achterhoek liemers

Plat praoten en laezen veur kinder: Wiesneus

Doot ze op jullie schole al met?

 

Veur ’t vierde jaor op riege wodt d’r op basisscholen in de Achterhook en Liemers de streektaalles Wiesneus egeven. In ’t gelieknamege blad staot leuke verhalen, opdrachtjes, puzzels, leedjes en nog völle meer. Kinder kunt zo op ’n spölse manier kennes maken met de streektaal. Sommegen kent ’t plat praoten van huus uut, veur anderen is ’t leuk um ’t te heuren en d’r meer aover te wetten te kommen. Tenslotte is ’t Nedersaksisch ’n volweerdegen taal, beheurt ’t tot ’t cultureel arfgood van onze streek en is kennesmaken met streektaal good veur de algemene taalontwikkeling.

 

Wiesneus 2021 is in april van start egaon en wodt uutevoerd deur de bibliotheken in den Achterhook (West-Achterhoek, Oost-Achterhoek, Achterhoekse Poort en Montferland). Basisscholen kunt zich elk jaor bie hun Bieb anmelden veur ’t lesprogramma, waornao één van de metwarkers van de bieb op schole les kump geven. Wiesneus is veural geschikt veur groep 5, 6, of 7.

Dit jaor is ’t deur de corona allemaol net wat anders. Liefelek lesgeven was (nog) neet altied meuglek. In Montferland hebt ze daor wat slims op bedach: ’n online Wiesneus-les. Beniejd hoe dat der uut zöt? Kiek hier maor es: https://www.bibliotheekmontferland.nl/wiesneus.html

 

Ok is de looptied van Wiesneus verlengd: niet töt de sommer, maor ok nog nao de grote vakantie wodt streektaal an ebaoden op scholen. Döt jullie schole ok al met met Wiesneus? Zo neet, dan kan de schole bie eur eigen bibliotheek an de bel trekken en Wiesneus alvast veur volgend jaor besprekken. Wi’j geerne dit jaor nog wat met Wiesneus doon, dan kan dat ok. Nem contact op met ’t Arfgoodcentrum Achterhook en Liemers via info@ecal.nu. Meer informatie kö’j vinden op www.ecal.nu/wiesneus. ’t Blad Wiesneus, lesmaterialen en leedjes staot op www.wiesneus.nl.