MijnECAL
  1. Home
  2. Nieuws
  3. Geslaagd spreektaalsymposium 2025
Publicatiedatum: 19-10-2025

Geslaagd spreektaalsymposium 2025

Woordwolk streektaal gevuul

 

 

Geslaagd spreektaalsymposium 2025

Streektaal verbindt, motiveert en inspireert. Dat werd weer duudelek tiedens ‘t jaorlekse streektaalsymposium van ‘t Erfgoedcentrum Achterhoek en Liemers op 5 november in ’t De Graafschap-stadion De Vieverbarg in Deutekom. Bekiek hieronder een sfeerimpressie van de aovend, met foto's van Hans van Kooten.

Foto van volle zaal streektaalsymposium 2025

Zo’n tweehonderd mensen waarn naor De Vieverbarg ekommen veur de viefde editie van ’t ECAL streektaalsymposium.

Foto van Frans Miggelbrink en ECAL-directeur Hans Berende

De aovend werd e-opend deur presentator Frans Miggelbrink en ECAL-directeur Hans Berende.

Foto van Diana Abbink en Marije Stomps

Diana Abbink en Marije Stomps, ECAL-streektaalfunctionarissen in den Achterhook, praoten met en vielen in waor neudig met vraogen en anvullende informatie.

Foto van Wim Daniëls

Heufdgast van den aovend was schriever en taalkundegen Wim Daniëls, den met zien ludieke verhaaln neet allene de lachers op zien hand kreeg, maor ok uut de doeken deed hoe ’t kan dat der steeds minder plat wodt epraot.

Foto van streektaalfunctionaris Susanne Braamburg

Der was völle te lachen den hele aovend. Ok veur Veluws streektaalfunctionaris Susanne Braamburg. ’t ECAL is namelek ’t taalinstituut veur ’t Nedersaksisch in Gelderland, dus ok veur de Veluwe.

Foto van SPÖL ’S PLAT!-talent Elena Jolie

Een keer himmaol wat aans dan boerenrockmuzeek: SPÖL ’S PLAT!-talent Elena Jolie en heur begeleidingsband leet prachtege poëtische barokpop heuren. Zo hertalen ze heur eigen nummers in ’t Achterhooks en kreeg ‘Smells like teen spirit’ van Nirvana een beheurlek bruuierege tekst in ’t plat.

Foto van Peter Wormskamp en Martijn Wieling

Ok wetholder Peter Wormskamp (midden) en Nedersaksisch Hoogleraar aan de RUG Martijn Wieling schaoven bi-j Frans an taofel. Peter vertellen hoo ze in Voorst streektaal inzet um verbinding te zuuken. Martijn leggen uut hoo AI de streektaal wieter kan helpen en dat der nowedaags dan wel minder ‘moodertaalplatpraoters’ bunt, maor wel steeds meer ‘tweedetaalsprekkers’.

Foto van een betrokken deelnemer aan het woord

’t Publeek kon op verschillende manieren metpraoten op ‘t symposium: deur vraogen te stellen of opmarkingen te maakn in de mentimeter-app of in te sprekken deur de microfoon.

Foto van Kalm An-verslaggevers Charlotte en Ricardo

Hoowal de meeste luu in de zaal gin idee hadden wat TikTok is, maakn ’t verhaal van Kalm An-verslaggevers Charlotte en Ricardo toch völle indrök. Hun online video’s bereikt duuzenden plattelandsjongeren. ‘In de haarvaten van ’t platteland; in de keten, bij piratenzenders, op trekkertreks en festivals wordt nog steeds heel veel plat gepraat’, vertellen ze.

Foto van Joppe te Lindert

Joppe te Lindert van ’n Haelweg was derbie toen de koninklijke familie op Koningsdag in Durkum keet De Dolle Pony langs de route bezoch. ’n Dag um nooit te vergetten: ‘Maxima vroog of er ‘veel roulatie’ was in de keet. Noh jao, toen heb ik maor e-antwoord dat der veural roulatie is van de deerns dee der komt.’

Foto van stripmaker Herman Roozen

Stripmaker Herman Roozen (bekend van Boerderij-strip Opa) maakn de hele aovend cartoons van wat der allemaole gebeuren en werd ezegd. An ’t ende leet hee zien tekeningen zene en veurzag ze van gortdreuge Toldieks commentaar. ’n Super afsluting van ’t symposium!

 

 

Bekijk alle foto’s van het symposium op www.achterhoekfoto.nl.

 

 

 

  • © Erfgoedcentrum Achterhoek en Liemers 2026 |
  • Alle rechten voorbehouden |
  • Privacy |
  • Ontwikkeling & Design door DIMA.
Naar boven
MijnECAL